3 di Avrîl, Fieste de Patrie: un Friûl di incuintri e confront

UDIN. Ai 3 di avrîl dal 1077 l’imperadôr Indrì il Cuart al investì il patriarcje di Aquilee dal comitât dal Friûl… e vie indenant, la storie za le cognossìn, ogni an cui che al inmanee la Fieste de Patrie al ricuarde i fats di chê volte. Ma une fieste che e sedi pardabon de Patrie, ta chest an 2013, e à di fevelâ a noaltris, ae nestre int, al dì di vuê. E, soredut, e à di vê la olse di pandi cemût che a stan lis robis.

Prin di dut, o vin di savê, de bande di chei che a àn lis responsabilitâts politichis e aministrativis, se il Friûl al à un avignî, un Friûl furlan e plurâl, un Friûl che al à a cûr la sô identitât e lis sôs identitâts. E je une domande che no scuen vê rispuestis gjenerichis o complasentis, a la taliane vie, ma sclete, fevelant fûr dai dincj. O vin anche lis votazions regjonâls, ai 21 e 22 di avrîl, ma lis cuistions a van dilà di chest apuntament, par vie che a rivuardin la specialitât e la centralitât dal Friûl rispiet a cheste bande de Europe, daûr de sô storie.

Se o volìn memoreâ il 3 di avrîl e il Patriarcjât, alore lis prospetivis no samee che a sedin dentri di macroregjons talianis inventadis di plante fûr, che a varessin l’epicentri a Milan. La gjeopolitiche e une tradizion storiche milenarie nus palesin une Patrie nestre che e cjale la Slovenie e la Carintie, la Istrie e la Stirie, il Cjadovri e il Tirol, il Trentin, la Baviere, la Crauatie, indulà che il Friûl al è presint cu la sô muse plurâl e si cjate a cjase sô.

Dal sigûr o sin dentri de Republiche Taliane, ma ancje dentri te Union Europeane e l’orizont perfet pal svilup dal Friûl al è dentri cheste realtât, che e je dute di fâ sù te sô plenece. Parce che il Friûl (Vignesie Julie) al à la specialitât che e diven propit de sô muse (des sôs musis) e de sô colocazion internazionâl. Une volte si fevelave di «confin», di «ripâr/arzin» rispiet al mont todesc e slâf, ma cumò o sin plui tal just fevelant di incuintri. Il Friûl nol è dividût de Slovenie o de Austrie di un confin, ma si cjate cun Slovenie e Austrie in spazis determinâts, che a son lis Alps, il Cjars, il cors des aghis.

La peraule «incuintri» e je la peraule plui fuarte e biele di dute la storie de Patrie e dal Patriarcjât, par vie che di simpri e à caraterizât la realtât di chestis istituzions: lis lenghis, lis culturis, lis etniis, lis tradizions si son simpri «incuintradis» e «confrontadis» culì. Si son metudis dongje par viodi someancis e diferencis, plui di cualchi volte si son miscliçadis. Il Friûl al è furlan, al è sloven, al è todesc, al è venit-talian: cheste e je la sô ricjece, reson e fonde de autonomie speciâl.

Sino sigûrs che mantignî e svilupâ cheste specialitât, chest patrimoni di lenghis e di culturis, cheste vocazion europeane de Patrie e de Regjon Friûl-Vignesie Julie a sedin lis prioritâts des nestris classis politichis e aministrativis, economichis e culturâls? Chei che a fasaran fieste ai 3 di avrîl ano pardabon la sensazion dal moment che o vivìn e la cussience di intervignî?

Lu diseve, cun la juste preocupazion, ancje il President de Filologjiche inte assemblee dai 17 di març, che l’interès pal furlan e par dut ce che al rivuarde la nestre identitât, la culture e la autonomie nol è tant salt: o miôr, de bande di masse sorestants si pandin fastidi e malpazience cuant che si fevele di lenghe furlane e di robis furlanis! Al è clâr che si fevele ancje di politiche e di votazions, ma no dome di chest; cussì come che al è clâr che se la voie, il gust, la volontât di identitât no vegnin sù dai Furlans, dal popul, de int, des clapis culturâls, nancje i politics a palesin interès par chestis cuistions!

Ce fâ, alore? Butâ vie la Fieste de Patrie? O, miôr, participâ e fâsi sinti? Il sens dai 3 di avrîl nol è chel di «celebrâ», di cjalâ indaûr, di peâsi al passât, ma di memoreâ simpri la nestre storie, par cjatâ lis sôs liniis e struturis e fâlis vivi, intal dì di vuê e cuntun voli intal avignî.