Cuant che cui “azzurri” si cjacarave par furlan

Apene finide la lagne dal campionât talian, sot cu l’Europe dal balon in France. E subit robis di sgrisulâsi: barufonis di no crodi tra inglês e rus plens di bire e di rabie a Marsilie, pachis e legnadis ancje di altris bandis. Un miracul che nol sedi scjampât fûr ancje cualchi muart e grant lavôr tai ospedâi par justâ int insanganade. Insome une Europe dal balon brute e imberdeade come (par no dî piês) chê dai politics, dai banchîrs, dai mûrs e des cjacaris.

Pôc di biel ancje tes primis partidis, robe di indurmidîsi, pretesis scuadronis e zuiadorons a bati la sflacje, cualchi golut vignût fûr par câs. «Che a vedin cjapât par model l’Udinês?» si domandave spaurît cualchi tifôs furlan ingomeât par chel che al veve dovût butâ jù tai ultins timps.

France, Spagne, Gjermanie, Inghiltere, presentadis come buinis di fâ spetacul e segnâ sglavinadis di goi, a sfrancjâsi fûr apene apene, robute insome.

«O stin frescs se nus tocje une solfe cussì par un mesut o jù di li», si lamentavin di ca e di là. Come se nol bastàs, nissune fiducie su la nazionâl taliane, metude insieme cence campions, cun Conte destinât a lâ vie e tante int in spiete di podê tirâ fûr critichis e sglonfâ polemichis in câs di brutis figuris. Prime partide dai talians cul Belgjo, deventât a dite dai esperts un scuadron cuntune schirie di zovins plens di cualitât e fantasie, scuasi ducj deventâts belghis ma fioi di nassûts ator pal mont e rivâts alì par cjatâ alc di fâ e di mangjâ. Insome ducj a crodi a une brute fin pai nestris talianuts. E invezit une grande biele partide, un gol di Giaccherini (migo Tardelli) e un di Pellè (migo Gigi Riva), 2 a 0 pe Italie e ducj contents e a dî «ma ce brâfs, ma ce biel, e cumò vignît a fâ i conts cun noaltris».

Buine intant ancje la seconde: batûts i svedesons cence tante braùre, un golut butât dentri tal finâl di un zuiadôr che di talian al à dome alc di passadut tal sanc. Si va indenant, lassant indaûr la pôre di tornâ a cjase subit. Nuie di ce gloriâsi plui di tant, ma almacul la sigurece di no jessi sbatûts fûr a colp. Contentìnsi, il diaul nol pâr cussì brut e trist. E cuissà che no nus tocji di gjoldi ancjemò.

Aromai di cualchi an mi viôt i Europeos (e ancje i Mondiâi) stant a cjase, e la int saldo a domandâmi se no mi displâs di stâ fûr di cheste grande fieste dal sport e dal balon. Sì, o ten dentri di me tancj biei ricuarts ingrumâts in agns e agns a torzeon pal mont, ma, o dîs la veretât, a part i agns che a pesin su la schene, no varès cumò tante gole di lâ ator cun dut chel che di brut e di pericolôs si cjate in zîr.

Mi pâr ancje che i rapuarts umans no sedin plui come une volte, cui zuiadôrs si fevelave, si scherçave, si zuiave di briscule o di biliart, si stave insieme. A mi po, i prins agns che o lavi ator cu la nazionâl, mi tocjave il grant gust di cjatâ tancj furlans, di tabaiâ cun lôr in lenghe mari, cun chei altris gjornaliscj che a vevin pôre che mi contassin cuissà ce robis di tatiche e di formazion e magari invezit o cjacaravin di storiis dai nestris paîs.

Cemût dismenteâ lis cjacaradis con Bearzot, Zoff, Burgnich, Collovati, par no contâ di chei come Janich, Delneri, Giacomini, parfin il bisiac Capello e tancj altris. Ma in chei agns i. furlans che a zuiavin di balon a jerin ator par dute l’Italie.

Cualchidun cumò al dure come alenadôr ancjemò in piste, ma di zovins une miserione, no si pratint che a rivin in nazionâl, ma almancul tal Udin. Meret al è rivât aromai dongje. In ogni câs, ancje cence furlans, sperìn che l’Italie e fasi ben in France, scomençâ ben al jude a fâ ben.

Cumò al è di viodi se gli azzurri, par dîle a la taliane, a savaran zuiâ ben e vinci ancje cun scuadris mancul gjenerosis dal Belgjo e de Svezie simpri indenant cul cjâf tal sac.

Cuant che nus tocjarà a nô fâ la partide la storie e podarès deventâ dificilute. Ma sù mo, sperìn ben. Brave la scuadre e ancje i tifôs talians, che a restin cussì ancje cuant che no si podarà vinci.