Furlan a scuele, lis adesions a rivin al 70%

UDIN. Plui di cualchi intervent o vin let, tes ultimis setemanis, su la cuistion de lenghe furlane e, soredut, dal furlan a scuele: cualchi intervent plui informât, cualchidun altri mancul (o par nuie). Par furtune, nissun no si insumie plui di discuti dal status di lenghe dal furlan e ducj o vin podût lei cun sodisfazion, par altri, la sentenzie de Cort costituzionâl (n. 215 dai 18 di Lui), ch’e à scancelât une vergognose discriminazion tra lis lenghis che la leç 482 dal 1999 e ricognòs, discriminazion introdusude cu la spending review dal 2011.

Un altri discors al sarès chel di verificâ se lis previsions des leçs di tutele, no dome chê statâl, ma ancje chês regjonâls, a vedin vût cualchi efiet par fermâ il decrement dal ûs dal furlan te nestre comunitât; la Regjon - e chest al è il sens des normativis - e à di esercitâ une politiche lenghistiche ative di promozion de lenghe, no dome di spietâ e rilevâ cemût ch’a van lis robis. Se i risultâts no son in linie cui obietîfs declarâts de leç, la Regjon e à di impegnâsi di plui.

Une part impuartant de politiche lenghistiche e rivuarde il setôr de istruzion, par vie che la trasmission dal furlan ai nestris fruts, e ancje une gnove e salde cussience dal probleme, a son elements fondamentâi par miorâ la situazion. L’an passât o vin vût, finalmentri, l’inviament de programazion curicolâr de lenghe furlane a scuele (infanzie e primarie). Chest risultât, come ch’o vin bielzà segnalât, nol è stât dome par une cuistion di dirit (lis leçs di tutele lu disin a clâr), ma ancje pal favôr che i gjenitôrs a continuin a dimostrâ, an dopo an, rispiet a chest argoment: lis adesions al insegnament dal furlan a scuele, tes ultimis rilevazions dal Ufici Scuelastic Regjonâl, a rivin al 70% dal totâl, un segnâl di une impuartance straordenarie. Ancje chest an, duncje, l’insegnament curicolâr de lenghe furlane ur sarà impartît ai scuelârs de scuele de infanzie e de primarie che lu àn domandât; lis scuelis secondariis di prin grât - lis scuelis mezanis - a rivaran a finanziâsi dome che presentant une domande par progjets di pueste.

Daûr de esperience dal an passât, almancul dôs a son lis indicazions di tignî cont pe Direzion regjonâl de Istruzion. La prime e je la dibisugne di formazion pai insegnants in servizi, i insegnants ch’a àn dade la disponibilitât ae iscrizion ae liste regjonâl dai docents cun competencis certificadis in lenghe furlane. La Societât Filologjiche Furlane, in acuardi cu la Direzion regjonâl e daûr convenzion, e à organizât cors di lenghe, culture, musiche, lenghistiche e tradizions popolârs par passe 550 insegnants che lu vevin domandât. Cheste e je stade une azion fondamentâl, une vore preseade, ch’e varès di vê continuitât ancje pal an cu ven: prioritari, duncje, al è predisponi un gnûf plan formatîf e metilu in vore prime pussibil. La seconde indicazion e rivuarde i materiâi didatics di meti a disposizion di insegnants e scuelârs. Ta chest setôr o podìn fâ stât su l’esperience di agns e agns di sperimentazion didatiche, lis cussì clamadis buinis pratichis, al bastarès concentrâsi su la sielte di cualchi titul, za fat, inzornâlu e tornâ a publicâlu ancje in rêt e cun modalitâts di lavôr interatîf, no dome su la cjarte. Lis risorsis, magari cussì no, a calin: o vin di lavorâ par invertî cheste tindince, cirint une condivision simpri plui alte su la cuistion (e chest o podìn fâlu dome che pontant su la cualitât), ma par intant o vin il dovê di doprâ pal miôr ce ch’o vin. L’uniche soluzion e je che i sogjets che si interessin di lenghe furlane a fasin scuadre e ch’a rivin a rindi la tutele e la promozion dal furlan une cuistion prioritarie pe Regjon. Dome cussì o podìn sperâ di no scugnî spiegâur, ogni an, a chei pôcs che no lu capissin - o ch’a fasin fente di no capîlu - che chest fondamentâl patrimoni culturâl, la lenghe furlane, e je une ricjece par ducj.

*President de Societât

Filologjiche Furlane