Il Mittelfest al tache fevelant in marilenghe
UDIN. Mittelfest 2013 si vierç in lenghe furlane. Il bon esempli lu àn dât l’an passât i Siums leteraris di Gigi Dall’Aglio; chest àn invezit si cole sul teme de emigrazion, viodude cui voi di une fie e gnece di emigrants cjargnei in Svuizare e cumò a stâ in France. Chei voi a son di Nadia Fabrizio, autore e protagoniste dal Emigrant che inte sierade al à fat il plenon al Théâtre National di Bordeaux e a zornadis al rive in Italie, in prime nazionâl al Ristori di Cividât. Il spetacul, poiât de Arlef, al è in program par vinars ai 12 di Lui aes 5 e mieze daspomisdì.
«O fâs part di chê schirie di int simpri in cercje des sôs lidrîs», e mutive Fabrizio, e chest forsit al è il destin di ducj i fîs di emigrants, chei che o clamìn di seconde, o di tierce gjenerazion; lôr, nassûts di une bande ma leâts cul cûr ae tiere dai paris, si dividin tra presint e passât, tra achì e là vie. Là vie, par Fabrizio, e je la Cjargne, cognossude pe prime volte tal 1976, co e jere pôc plui di une frutine.
«Gno pari nus puartà, mê sûr e me, a cjatâ i nonos tornâts a stâ in Friûl dopo une vite di emigrazion in Svuizare. L’orcolat al veve disdrumât cjasis e int, ma la corâl di Davâr e cjantave la furtune di chei che a jerin restâts vîfs. Mi indurmidivi niçade di chel cjant e d’in chê volte no ai mai molât di amâ il cjargnel».
Il secont incuintri cu la tiere dai vons al è cuant che la autore e cognòs il Povolâr Ensemble di Giorgio Ferigo. Velu une altre volte il cjargnel, chê lenghe dificile, ruspiose e dolce come lis monts, lenghe foreste e lenghe mari dutun. I Chants du Friûl - che a son ancje racuelts intun cd rincurât e distribuît in Italie e in France di Valter Colle e dât fûr insieme cuntun librut trilengâl in francês, talian e furlan - a partissin de tradizion, il cjant a cappella a dôs vôs, par dâ une leture gnove de musiche di Ferigo, cundut il lancûr e l’amôr pe sô tiere e pe sô lenghe.
Un siôr repertori puartât in sene cuntun arangjament gnûf, te forme dal teatri cjançon li che musiche e narazion si messedin une cun chê altre. Lis vôs a son des sûrs Nadia e Katia Fabrizio, la ghitare di Philippe Vranckx e puarte une note di flamenco e il liron di Christophe Kodet un aiarin di jazz: ancje i musiciscj, po, a emigrin di esperiencis e culturis diferentis par cjatâ une gnove identitât dentri di chest progjet.
Tal spirt plurilenghistic di Mittelfest, che al sburte l’ûs dal furlan massime tal setôr dai spetacui, e je in program a Cividât ancje une altre produzion in marilenghe. Sabide ai 13 di Lui, aes 6 sotsere, te glesie di San Francesc al sarà presentât il gnûf lavôr dal mestri Valter Sivilotti, che al à metudis in musiche lis poesiis plui vivarosis di Pieri Çorut.
No par câs il titul al è Strolic, come il lunari poetic che il scritôr nostran al publicà te metât dal Votcent. «Un spetacul di snait e biel ridi», al promet l’autôr. Protagoniscj sul palc a saran la corâl Natissa di Aquilee direzude di Luca Bonutti, la vôs soliste di Claudia Grimaz, musiciscj di rispiet tant che Sebastiano Zorza ae armoniche, Marko Feri ae ghitare e Mauro Meroi al liron; la vôs vive dal Çorut le scoltarìn recitade di Omero Antonutti.
Riproduzione riservata © Messaggero Veneto
