Timp di gjoldi, di savoltâ i valôrs e la ande de vite FOTO | A Udine - Crazy bob a Forni di Sopra - A Romans d'Isonzo - A Savogna | VIDEO - A Udine - Slitte pazze

Chest almancul pes tradizions plui antighis, parcè che il Carnevâl al à simpri vût alc di vieri e alc di gnûf: nol pues jessi noiôs e simpri avuâl, se no al devente un cuintrisens. Il studiôs francês Jean-Richard Bloch al scrivè dal 1920 che «Carnaval est mort» (al è ancje il titul dal libri, cjapât sù di un discors che al veve sintût di un buteghîr florentin) e su chest a àn vût resonât in tancj, no par ultin Julio Caro Baroja intal biel saç El Carnaval (1965).

Ma il carnevâl, vie pe storie, al è simpri muart e al è simpri resurît, in France e in Spagne e chenti ca. Za Ostermann intal so Vita in Friuli (lât fûr dal 1894) al memoreà fats e datis di robis che si imbastirin pe prime volte vie pal Votcent par imitazion di mascaradis, velions, spetacui che si fasevin di altris bandis, par esempli a Milan; ma al metè dongje dutis lis formis di cheste fiestone e di chest moment dal an che a jerin ben vivis intes vilis, intes valadis, intes citâts e che a corispuindevin a tradizions che si cjatavin intes cjartis dai archivis.

La carateristiche principâl e jere (ma e je ancjemò!) chê di stravistîsi, di gjoldi, di ridi e fâ ridi, di esagjerâ, di savoltâ i valôrs e i ritmis de vite normâl: robis che a fasevin insospetî i sorestants.

Par chest lis autoritâts (de Glesie e de aministrazion civîl) a àn simpri cirût di meti un fren a tantis di chestis manifestazions, par pôre di disordins e violencis o ben di pericui pe religjon e pe morâl. E cualchi volte al è sucedût propit il davoi: il Carnevâl plui innomenât de storie furlane al fo chel dal 1511, ai 27 di fevrâr, une Crudêl Joibe Grasse che e invià la rivolte contadine che e le indenant par dîs e dîs cul brusâ cjastiei, copâ nobii, ocupâ tieris.

E dut al jere scomençât cuntune mascarade, dulà che il partît dai Savorgnans al metè fûc par profitâ de situazion e stiçâ la fulugne cuintri dai siei nemîs. L’aspiet carnevalesc al vignì a flôr, par esempli, cuant che la clebe e metè a sac i palaçs dai nobii a Udin e, grampâts lis viestis di femine, i oms lis meterin sù.

Plui di cualchi Comun, intant de Ete di Mieç, sedi intai Statûts sedi dentri di altris disposizions, al improibì di cuvierzisi la muse cu lis mascaris o di metisi intor stravistiments, massime chei di predis, vescui, muinis, diaui, politics, cence dî di chei che a olsavin fâsi viodi cu lis armis in biele mostre.

E alore, se propit no si podeve blocâ dut, si cirive di controlâ, di puartâ inte strade juste, di fâ deventâ plui mugnestri il carnevâl, di stratignî i ecès. Cussì, intes citâts (dulà che si ingrumave ancje la int che e convignive des valadis e des campagnis) si mandavin pes stradis, pai cuartîrs e pai borcs dai suburbis il cjapitani cun vuardiis e soldâts, par garantî l’ordin.

Une carateristiche impuartante e jere chê des mangjadis e des passudis, des bevaçonis, des barachadis pantagruelichis: il Carnevâl al dave la ocasion a ducj di jemplâ il stomit e ancje di fraiâ e pacjocâ. Chest aspiet al jere chel plui tolerât, tant che lis usancis dai crostui e des fritulis, par fâ un esempli, e je ben vive e sane. Intai secui medievâi e modernis, cetantis fradaiis a vevin il c

ompit di dâ fûr dolçs intai ultins dîs di carnevâl (carnevalut o inseri o sevrut, martars gras o carnevalon): «Item spendey lu dì di Sivrut par fa tazint fertulis al povers S. vij» (Sante Marie dai Batûts di Udin, 1435, daûr de trascrizion di Valantin Ostermann).

Si viôt che a crodevin che, cu la panze plene, e passave la gole di fâ riviei…